(Gipo Farassino)

MI ‘v parlo ‘d coj ani che ij giovo ‘d vint’ani

a ricorderan nen,

Pòrta Pila a col temp là

co’ij sò banchc e ij sò mërcà,

l’era come na fran festa;

’m ricòrdo a la sèira, an sle rive dla Dòira

l’era pien ëd masnà.

Soma conossusse là, ti ‘t fasie la sartòira

e mi j’era ‘n disperà.

Pòrta Pila, Pòrta Pila,

a vorìa dì: sensa sagrin.

Pòrta Pila, Pòrta pila,

ël pì bel borgh dël nòstr Turin.

Të spetava ògni sèira, tacà a cola pentnòira,

pròpi sota toa ca,

mì fasia ij sàut mortaj

për comprè quatr nassionaj

e portete al cine Auròra;

e peui quand i rivavo dal nòstr gir i ancontravo

lw maraje dël borgh;

is fërmovo ‘n sël canton

mi ciapava na ghitara

e it cantava na canson.

Pòrta Pila, Pòrta Pila

a voria dì: vorèjse bin.

Pòrta Pila, Porta Pila,

ël pì bel borgh dël nòstr Turin.

Quandi soma lassasse, ‘m ricòrdo bin il’hai dite:

”it vedrass che ‘n bel dì,

mi ritornerai a cà

pien ëd gran e rispetà

e col ddì ti ‘t saras mia”.

Ti ‘t piorave e ‘t rijie o ògni tant t’ëm disìe:

”MI të speterai si.

Torna prest ansema a mi,

la mia vita sarà grisa

sarà veuida sensa tì”.

Pòrta Pila, Porta Pila,

a vorìa di: vorèjsse bin.

Pòrta Pila, Pòrta Pila,

ël pì bel borgh dël nòstr Turin:

L’hai scrivute quàj vòlta e ti ‘t l’has rispondume.

Ma peui ti ‘t l’has chità,

e adess ch’i son tornà,

l’hai savù ch’it ses marià,

’t ses pì nen a Pòrta Pila;

col negòssi ‘d pentnòira j’è pì nen e la Doira

a smija ‘n canal ëmbotija,

cò ij so mërcà quatà:

Pòrta Pila a smija mòrta

e mì canto magonà:

Pòrta Pila, Pòrta Pila,

la gioventù sensa sagrin.

Pòrta Pila, Pòrta Pila,

adess lìè mach p’ ‘n seugn lontan